Mona Lisa

Í dag var fínt veður, skýjað en um 20°hiti.  Við fórum á markaðsgötuna hér við hliðina í morgun og keyptum ávexti af bændum - nýbakað brauð og croissant, kaffi o.fl. 

Fórum síðan í Louvre safnið - en Sindra er búið að langa mikið til að sjá Mónu Lisu.  Þegar við vorum alveg að koma upp að henni - kom vörður og dró Sindra fram fyrir alla þá fullorðnu og lét hann standa beint fyrir framan myndina.  Hann var frekar ánægður með það - sem og við hin fyrir hans hönd.  Hann sem er 10 ára gengur með ýmsa drauma í maganum - og hlakkar til að skoða og sjá ýmislegt í heiminum - sem mér finnst mjög gaman að.  Hann var frekar svekktur í fyrra þegar við náðum ekki að sjá skakka turninn í Pisa - en hann fær að sjá hann þetta árið.

Ég ætla ekki að hafa þetta lengra í þetta skiptið, þar sem við ætlum að fara að skriða í rúmið - vorum að klára að pakka saman, en við leggjum af stað snemma í fyrramálið, gistum í s-Frakklandi á morgun - rétt hjá Mont Blanc.  Þannig að ég blogga ekkert fyrr en á laugardag - þegar við erum komin í húsið á Ítalíu - þ.e.a.s. ef nettenging virkar þar.

En við höfum það öll mjög gott - biðjum að heilsa öllum - Lauja og co.

 

Fréttir af pabba

Matta sendi mér SMS en pabbi er sem sagt að hressast.  Tekið var vefjasýni úr lungunum á honum s.l. föstudag - en ekkert kom út úr því sem er gott.  Hann er kominn á 2 manna stofu - og steig í fæturna í gær - eitthvað sem hann hefur ekki gert í þónokkurn tíma.  Þetta voru allavega góðar fréttir - en hann er samt talsvert ruglaður.  Var farinn að halda að Hrabba og Adda væru báðar búnar að skipta um nafn og farnar í læknisfræði - hann bað mig að kanna málið nánar. 

En það er bara dagamunur á honum, hann þekkir okkur og allt hans nánasta - en virðist vera að upplifa gamla atburði - og ruglar þeim dálítið saman við það sem er að gerast í dag.

 

Sól og 25° hiti

Veðrið leikur við okkur hér í París, sól og 25 stiga hiti - fín gola - þannig að okkur líður mjög vel hérna.

Fórum í Lúxembúrgargarðinn í dag til að njóta lísins, keyptum okkur brauð, croissant - bjór og gos - sátum á stólum og nutum lísins.  Andri og Erla fóru aðeins og settust upp í grasbrekku sem var á bak við okkur - en eftir stutta stund komu 2 lögregluþjónar og bentu á að þetta væri ekki æskilegt.  Andri spurði hvað löggan hefði gert ef hann hefði neitað að færa sig - "Ég sagði að þeir sem færu ekki eftir lögum og reglum í París væru bara skotnir" - hann trúði ekki mömmu sinni - hún bullar stundum dálítið í honum.

Við röltum um garðinn - Erla var nú orðin frekar þreytt á heimleiðinni - en við sáum skemmtilega búð sem selur Barbapapa vöru - og lofuðum við henni að kíkja í hana á morgun og kaupa eitthvað pínu fyrir hana þar.

Við fórum út að borða í kvöld á afskaplega fallegan stað, hann er frá árinu 1906 - og er í Art Nouveau stíl - og er í dag skráður sem sögulegur minnisvarði.  Forréttir og eftirréttir voru hreint út sagt frábærir, nautasteikin var góð - þó ekki stórkostleg, ég fékk mér reyndar nautalund með gæsalifur í búrgundarsósu - hún var mjög góð.  Þessi staður var með þeim fallegri sem við höfum farið inn á.  Kvöldið var yndislegt.  Ég set hér inn slóðina á staðinn :  http://www.bouillon-racine.com/en/home/index.html

Ég makaði sólavörn á Erlu áður en við fórum af stað í dag - en gleymdi öðrum - þannig að við Tanja erum aðeins rauðar - en þá er bara að maka á sig After sun og Aloe vera geli.   Sindri er strax farinn að taka lit - hann er bara ótrúlegur - um leið og sólin fer að skína þá er hann búinn að taka lit.

Hann er svo ólíkur okkur hinum með svo margt - algjörlega aðdáunarverður í svo mörgu.  Ef hann er saddur - þá er hann saddur - þá stoppar hann að borða sama hversu gott það er.    Hann er meira að segja  farinn að biðja um grænmeti á diskinn sinn!!  Ingi hefur nú stundum efast um að hann eigi eitthvað í þessu barni - sérstaklega þegar hann kom með yfirlýsinguna "ÉG HATA KJÖT" - þá vildi Ingi nú bara senda hann í DNA próf !!

Við erum búin að ná góðum tökum á GPS tækinu  - og er sú græja að verða góður fjölskylduvinur.  Eins gott að passa sig á að stilla á tækinu að maður sé fótgangandi en ekki keyrandi - út af einstefnugötum - það er bara snilld ef maður gleymir að skrá að maður sé fótgangandi - þá eru alls konar einstefnugötur sem tækir segir manni að taka aukakrók út af.  Ég hefði ekki fattað það ... enda er Ingi kominn með græjupróf á það.

Núna sitja börnin og spila Yatzy - nema Erla liggur á gólfinu að teikna og lita - hún er reyndar að biðja um að fara í bað - Ingi reddar því. 

Við vorum ekki búin að keyra inn í tölvuna disk til að geta keyrt inn myndir úr stóru myndavélinni - þannig að við keyrum bara inn myndir úr litlu vélinni - en það sleppur.

Ég ætla að fara og setja inn nokkrar myndir núna á barnalandssíðuna hennar Erlu.

Heyrði aðeins í Hröbbu áðan - þau eru komin á leiðarenda þreytt og voru að fara að fá sér pizzu.

Sólskinskveðjur til ykkar allra frá ferðafólkinu í París

 

Ekta túristar í París

Já, við vorum ekta túristar í París í dag.  Fórum í bátserð á Signu og  upp í Eiffel turninn - alla leið upp í topp.  Ég er nú bara hissa á sjálri mér að guggna ekki á því á síðustu stundu - enda er ég afskaplega lofthrædd - miklu meira en í meðallagi - við biðum í röð í einn klukkutíma.  Mistur var yfir borginni - en ótrúlegt að horfa yfir.  Þvílíkt útsýni.  

Á Signu sigldum við - og á bökkum Signu situr fólk hér hér og þar í innilegum faðmlögum og kyssist ofur lengi - fólk á öllum aldri - sem mér fannst gaman að sjá - ekki bara unga fólkið - París er sem sagt borg allra elskenda - ekki bara ungra.

En á einum bakkanum sátu nokkrir karlar saman að drykkju - og síðan vildi svo skemmtilega til að einn þeirra girti niður um sig brókina og dillaði "rassinum" framan í túristana - það lífgaði nú bara upp á - verst að börnin misstu af þessu.

Veður var ótrúlega gott í dag, sól og 27°C hiti - þannig að við vorum léttklædd.  Golan í þessari borg bjargar Inga algjörlega - þó svo að þessi hiti sé - þá er ágætis gola og manni líður vel í þessum hita.

Við erum orðin svolítið þreytt eftir daginn, börnin eru að skipta sér í sturtu - síðan í rúmið. 

Ingi fór út í markaðsgötuna við hliðina áðan með  3 eldri börnin og þau komu heim með kebab í kvöldmatinn - sem var afskaplega gott. 

Á morgun er ætlunin að vakna snemma og nýta daginn, fara og skoða Monu Lisu - og svo ræður bara skapið og veðrið ferðinni.

En við biðjum að heilsa ykkur öllum.

 

Jú hann er í vísindaslopp

Jebb, hann er í vísindaslopp - sögðu börnin yfir sig ánægð þegar þau sáu nágrannan í dag.  Hann er mjög "vísindalegur í útliti"  grátt og tætt hár út í loftið - en skalla beint uppi á kollinum.  Hann minnir okkur á "Back to the Future" vísindamanninn.

Við verðum að reyna að ná mynd inn til hans - það væri virkilega gaman, það er verst að hann býr þarna líka.  Gæti verið frekar vandræðalegt ef við fullorðna fólkið lægjum á glugganum hans að taka myndir.  Við sendum börnin í það.

En við röltum í bæinn áðan, fórum að skoða Notre Dame kirkjuna að utan og innan og urðum afskaplega hrifin.  Mjög gott veður og fórum við eins og bjánar með jakka og regnhlíf í bæinn - við vorum þó ekki þau einu í París sem gerðum það.  En jakkinn hékk á töskunni allan daginn og ákveðið að fara ekki með hann aftur.

Við fórum á veitingastað sem heitir "Hippopotamus"  og tókum barnamatseðil fyrir börnin, þau fengu 200 gramma kolsteiktan borgara, með frönskum, og smarties-ís á eftir, ásamt drykk með matnum á aðeins 7,90 Evrur.  Þau urðu pakksödd - náðu ekki einu sinni að klára.

Við fórum með GPS tækið með okkur til að rata um París eins og innfædd.  Gekk það afskaplega vel - nema þegar við vorum á heimleið.  Við vorum komin á einhvern fáránlegan stað þegar tækið tilkynnti "KOMIN" - við Ingi horfðumst í augu - (þau voru á stærð við undirskálar í okkur báðum) - og skildum ekkert í þessu helv... rugl tæki - fleygja þessu drasli - en við höfðum matað tækið á röngum upplýsingum um staðsetninguna á íbúðinni.

Börnin voru ekki glöð með okkur en við fengum fína hreyfingu - og þau ættu að sofna snemma eftir þennan aukagöngutúr á heimleiðinni.

Var að setja inn smá af myndum á barnalanssíðuna hennar Erlu.  Höum það gott - keyptum okkur brauð eins og er í "Felix" bókinni hennar Erlu og bragðaðist það afskaplega vel.

Biðjum að heilsa öllum -

Ingi - Lauja - og börnin -   GPS-arar

 

Komin til Parísar !

Ferðin gekk afskaplega vel, vélin fór á réttum tíma, og vorum meira að segja örlítið á undan áætlun.  Á leið úr vélinni og í flugstöðina var "strætó" og Erla sat við hliðina á "Ágústu Evu Erlendsdóttur" sem er betur þekkt sem Silvía Nótt - en Erla fattaði það ekki - skrítið! 

Engan tíma tók að ná í töskur - Ingi birtist bara allt í einu með þær allar í einu - þannig að þetta gekk allt eins og í lygasögu.

Við byrjuðum á að sækja lyklana, keyrðum framhjá Eiffel turninum sem krökkunum fannst æði - keyrðum alveg upp við hann og fannst þeim skrítið hvað hann væri ótrúlega stór!

Íbúðin er mjög skemmtileg, á 2 hæðum með öllu sem þarf, uppþvottavél, þvottvél, hárþurrku, sjónvarp, DVD, CD spilara og nettengingu - surprise !  (hvernig gæti ég annars verið að blogga).

Við tókum nesti með okkur, flatköku, hangikjöt, kókómjólk, kaffi og mjólk sem kom sér vel í gærkvöldi og í morgun. 

Eigandi íbúðarinnar kom til okkar kl. 10:00 (8:00 að íslenskum tíma) til að fara yfir hvernig hitt og þetta virkaði. 

Til að fara inn í íbúðina þurfum við að fara úr húsinu og inn í lítinn garð sem er umkringdur húsum, falleg blóm og jarðarberjaplöntur eru í þessum garði og risastórt tré.  Beint á móti okkur er íbúð með stórum gluggum og héldum við að þetta væri vinnustofa listmálara - en á íbúðinni eru mjög stórir gluggar  - gardínulausir þannig að við sáum beint inn - við lágum sem sagt ekki á gluggunum að reyna að finna út hvernig fólk væri þarna!

En þegar eigandinn  kom áðan spurðumst við fyrir um nágrannana, sem að hennar sögn er mjög fínir - meðal annars er brjálaður vísindamaður í íbúðinni beint á móti okkur (ekki franskur listmálari) - hann vinnur á hvaða tíma sólahrings sem er - og hann heldur að hann sé að vinna fyrir NASA, klikkaður gaur en besta skinn.  (Ef maður vaknar á nóttunni þá ætti maður að kíkja út um gluggann til að athuga hvort hann sé að vinna).

Við ætum að fara að hafa okkur til - kíkja út á mannlífið.

Úti er rigning en hlýtt, þurfum sennilega að kaupa reglhlíf.

En ég blogga e.t.v. meira á eftir - allir biðja að heilsa öllum sem þetta lesa.

Við ætlum síðan að reyna að setja inn myndir á síðuna hennar Erlu - þetta er slóðin á síðuna hennar:   http://barnaland.is/barn/14564

 

 

Börn

Við verðum að passa okkur á því hvað maður segir þegar eyru barnanna eru opin – þau eru eins og svampar – apa allt eftir manni.

 

Ég var með Erlu í bílnum í gær – þá heyrist í henni  - “Ó nei – fokk – þetta er ljótur bíll” – Ef ég hefði 4 ára sagt þetta þá hefði móðir mín fengið áfall!!

 

En ég hef verið að rifja upp í huganum, síðustu daga ýmislegt sem við systur gerðum – á meðan foreldrar okkur héldu að við værum úti í saklausum dúkkuleikjum.

 

Fundum sígarettupakka – óopnaðan og skiptum bróðurlega á milli okkar, já meira að segja fékk Adda sinn skammt þó svo hún væri bara 5 ára, sátum uppi á Vatnsgeymi púuðum þetta “ógeðslega töff” og  höfum sjálfsagt komið heim allar gænar í framan og meira og minna slappar – mamma og pabbi tóku samt ekki eftir neinu.

 

Við prófuðum að kveikja í ruslutunnum í litlum kofa við Kennaraháskólann – litlu mátti muna í eitt skipti að ekki hefði kviknað í – þannig að við hættum þessu. 

 

Við þvældumst út um alla Öskjuhlíð ofan í gamlar skotgrafir  – eða hvað þetta var kallað, vorum endalaust í rannsóknarferðum þar. 

Ákváðum 1 dag að athuga hvar hitaveitustokkarnir myndu enda – við ákváðum að tékka á þessu eftir kvöldmat en komumst að því frekar seint að þeir voru endalausir –– svo hittum við einhvern sem fannst við vera úti frekar seint um kvöld og gaf okkur pening í strætó – þannig að við komum heim á auðveldan hátt. 

Það voru ekki gerðar neinar athugasemdir við þetta kvöldbrölt á okkur .  Sennilega höfum við alltaf verið fljótar að sofna á kvöldin eftir svona ævintýraferðir – og því fengið að ganga frekar lausar.

 

En ótrúlegt að við vorum stundum á þvælingi klukkustundum saman – engir gemsar – og foreldrar ekki með neinar áhyggjur.  Við komum alltaf til baka og yfirleitt á skikkanlegum tíma, en ég held samt að maður hafi haft virkilega gott af þessu.

 

Ég myndi samt ekki vilja að börnin mín væru að gera það sem við systur vorum að gera.

 

Fjölhæfir stjórnmálamenn

Jamm - þessir stjórnmálamenn er fjölhæfir

 

http://www.carmex-kiss.de/index.php?meintanz=247640513837

 

Ég fékk þetta sent  - og ákvað að leyfa öðrum að njóta ....

 

Pabbi minn

Já, hann pabbi er ennþá inni á LSH og verður þar í einhverjar vikur í viðbót - hann er allavega ekki á leiðinni heim.  Hann er búinn að fá annað hjartaáfall, blóðtappa upp í heila, vatn í lungun og þvagfærasýkingu, en hún útskýrir "ruglið" sem er í honum.  Hann hefur t.d. orðið að vera í öndunarvél til að hjálpa honum að anda, af því að öndunin hjá honum var svo stutt niður í lungun.

Sumt af því sem hann segir er óttaleg vitleysa, en annað er alveg í lagi.  En það er ósköp erfitt að horfa upp á hann svona lasinn.  Það á bara alls ekki við hann.  Hann hefur alltaf þurft að vera að sýsla við eitt og annað, hann er búinn að vera þarna í 3 vikur, honum líður mjög vel þarna upp frá, en drepleiðist, að liggja allan daginn, geta ekkert lesið þar sem nýbúið að að skipta um báða augasteina í honum og hann er ekki komin með ný lesgleraugu.  Hjúkrunarkonan segir að hann sé einstaklega ljúft gamalmenni - ekkert vesen á honum og skapgóður - heyr heyr - "like father - like daughter" !! 

Við Hrabba kíktum til hans í gær og var hann ósköp slappur, og hefur elst um mörg ár þessar 3 vikur.  Hann var t.d.  mun hressari s.l. mánudag.  En hann er að verða 85 ára og búinn að lifa góðu lífi - þannig að maður veit aldrei hvenær kallið kemur.  Líka þegar hann er mikill þrjóskupúki og vill alls ekki fara til lækna fyrr en ekkert annað er hægt.  Ef hann hefði fengist til að fara í eftirlit til hjartalæknis, eins og mamma er búinn að vera að reyna að ýta honum út í - þá væri hann e.t.v. bara heima núna í sínu "dútli". 

Fólk á ekki alltaf að vera að þrjóskast við að fara til læknis, þeir eru þarna til að líta eftir okkur.  Og að sjálfsögðu á maður að vera duglegur og fara reglulega í eftirlit.  - Ég tek þetta líka til mín - þarf að fara að endurskoða þetta. 

Manni finnst líka sorglegt að mamma treystir sér ekki til að heimsækja hann.  Hún er það illa á sig komin líkamlega að hún treystir sér ekki að fara í bíl til hans, og finnst mér það sorglegt.

En Hrabba er að fara til hans á eftir til að hjálpa honum að kjósa.  Verst að hann kýs alltaf rangt - en Hrabba láttu hann bara kjósa rétt - hann sér hvort sem ekkert við hvað hann merkir !  Smá grín!

Egill bróðir pabba kíkti til hans í gær og fannst honum "ruglið" vera talsvert í honum.  Unnþór og Gunnar hálfbræður kíktu til hans í fyrradag þannig að það er gott að fleiri en við systur kíkjum til hans.  Eggert bróðir hans  hefur líka verið að kíkja til hans, og veit ég að pabbi hefur mjög gaman af að fá þá til sín - til að rifja upp gamla tíma og strákapör.

Mamma heyrði í Valborgu tvíburasystur pabba í gær, hún er orðin ansi ræfilsleg, alveg blind og bakið er að drepa hana.  Hún er á heimili uppi á Kjalarnesi - ósköp ein og yfirgefin, barnabarnið hennar sem hún ól upp sem sína eigin dóttur - býr í USA - og eru samskipti ósköp lítil, Aðalheiður mamma hennar dó fyrir einhverjum árum, þannig að sá eini sem heimsækir hana er sonur hennar og hans fjölskylda.

Pabbi var að segja í gærkvöldi að hann gæti alveg hugsað sér að fara út í náttúruna og fara á fyllerí með Unnþóri - hann á þó sína dagdrauma - sem er allavega gott.

En mamma er ein í húsinu, sem er alveg agalegt.  Hún fær svima- og yfirliðsköst, hefur mjög litla matarlyst - en Parkinsons hefur víst áhrif á matarlystina - eða töflurnar sem hún er að taka.  Ef hún hefði verið nógu frek - ýtin og erfið og leiðinleg að komast að í mjaðmaaðgerð þá væri hún e.t.v. aðeins betri í dag en hún er. Jafnvel ef hún hefði verið útivinnandi þá hefði hún komist fyrr að - þvílíkt rugl !!!  En hjúrunarfólk hafði aldrei á ævinni sé jafn illa farna mjöðm og mamma er með.

En ég vil líka segja að heimilislæknirinn þeirra í Kópavogi er mesti andsk... aulalæknir sem til er - ekkert bein til hans nefi - hún hefði jafnvel komið betur út úr þessu öllu ef hún hefði haft almennilegan lækni.   -  Svo kjósa þau alltaf sama rassgatið yfir sig aftur og aftur !

Það er eldri kona að vinna með mér og hún komst í forgang í mjaðmaaðgerð af því hún var útivinnandi.  Eða var hún e.t.v. með almennilegan heimilislækni sem drullast til að hjálpa sínum sjúklingum og ýta á eftir að fá aðstoð fyrir þá !  - Í þessu tilfelli sat allavega sama ríkisstjórn!

 

 

 

Fyrir óákveðna

Jamm þetta er fyrir þá sem vita ekki hvað þeir eiga að kjósa -  

 http://xhvad.bifrost.is

Það kom mér allavega ekki á óvart - hvað ég ætti helst að halda mig við - en þegar ég valdi akkúrat öfugt við það sem minn hugur segir - þá var ég 87,5% sjálfstæðisflokksfylgjandi !

Gaman að þessu